Наредното лето, според сите индикации, ќе донесе голем број навистина спектакуларни трансфери.
Челси ќе има многу тешка задача да го задржи Кол Палмер во својот тим, бидејќи Карло Анчелоти побарал од управата на Реал Мадрид да го донесат одличниот Англичанец следното лето.
Палмер пристигна во Челси за околу 47 милиони евра минатото лето, откако Пеп Гвардиола не му даде шанса да игра во Манчестер Сити.
Очигледно, тоа беше голема грешка на Гвардиола, а Палмер го покажува тоа на теренот. Оваа сезона веќе постигна шест гола и додаде пет асистенции на девет одиграни натпревари.
Оваа статистика покажува дека во 54 одиграни натпревари откако пристигна во Лондон, Кол Палмер постигнал 31 гол и запишал 20 асистенции, и поради тоа е еден од најдобрите играчи во Премиер – лигата.
Според медиумите од Англија, навивачите на Челси нема долго да уживаат во неговите настапи во дресот на тимот од „Стемфорд Бриџ“, а за тоа ќе биде виновен Реал Мадрид.
Имено, управата на Реал Мадрид добила зелено светло од Анчелоти да го доведе Палмер следното лето во трансфер вреден 180 милиони евра, што би бил британски рекорд.
Наводно, челниците на Челси веќе започнале потрага по негова замена, а тоа би требало да биде крилниот играч на Борусија Дортмунд, Карим Адејеми.
