Бразилскиот дефанзивец на Зенит Санкт Петербург, Роберт Ренан, изненадувачки може да го облече дресот на Реал Мадрид оваа зима, пишува „АС“. На „кралевите“ им е многу потребен централен бек по сериозните повреди на Едер Милитао и Давид Алаба, а Ренан (20) изгледа одлична опција.
Од „Сантијаго Бернабеу“ разговараат да го земат на позајмица од рускиот клуб со опција за откуп. Уште во февруари, кога Ренан сè уште беше играч на Коринтијанс, Реал Мадрид покажа интерес за него.
Талентираниот дефанзивец беше редовен дел од репрезентацијата на Бразил до 20 години. Пролетва тој доби изненадувачки повик во сениорската репрезентација на неговата земја од привремениот селектор Рамон Менезес за мечот со Мароко.
