Селекторот на Австрија, Ралф Рангник, беше многу разочаран по поразот од Турција (1-2) и елиминацијата на неговата репрезентација во осминафиналето на ЕВРО 2024. Тој призна дека сѐ уште не може да поверува дека се елиминирани.
Според Рангник, неговиот тим немал среќа на овој натпревар, а го спореди и голманот Мерт Гунок со легендарниот Гордон Бенкс.
„Немавме доволно среќа. Мислам дека ако натпреварот одеше во продолженија ќе победевме. Имавме време да израмниме, но тешко е кога противникот го има Гордон Бенкс на голот. Не ги искористивме доволно нашите шанси и нѐ казнија од статични позиции“, изјави Рангник.
„Сите четири натпревари што ги одигравме беа многу возбудливи. Не одеше сè според планот, но испаднаа интересни, забавни и интензивни натпревари. Сега овие настапи треба да ги пренесеме во Лигата на нации и квалификациите за Светското првенство. Сепак, не можам да верувам дека ќе си одиме дома, верував дека ова патување ќе продолжи“, додаде селекторот на Австрија.
