Шампионот Струга Трим Лум ја совлада Беса со 1-0. Втор минимален триумф за тимот на Ќатип Османи, но и шест бода по две кола како единствена екипа во Првата лига.
Дефанзивецот Сава Радич беше стрелец на голот за стружани во 49.минута од натпреварот.
Шкендија и Работнички во Тетово одиграа 1-1. Гостите на стартот пропуштија две фантастични шанси, Дејли не погоди буквално сам пред голот, а Атдхе Мазари не реализираше пенал, шутирајќи само во дирекот од голот на Амзаи. Во 26.минута, Шкендија поведе по една несмасна реакција на голманот на Работнички, Игор Алексовски и Дин Аломеровиќ кој во обид да спаси си постигна автогол.
Работнички успеа да израмни со голот на Атдхе Мазари во 53.минута. Тој постигна прекрасен гол со удар со глава, откако во пад шутираше во небранетиот дел од мрежата на домаќинот.
Гостивар славеше против Шкупи со 2-0, а двоен стрелец беше турскиот интернационалец Алпер Потук.
Тој во 35.минута реализираше пенал за водство на гостиварци, кои на овој меч беа домаќини во Штип, а само четири минути подоцна искористи една грешка на гостинската одбрана и уште еднаш го совлада Иљази.
Силекс ја декласира Брера во Кратово со 4-0. Очигледно дека Алекссандар Васоски, кој во минатото беше тренер и на струмичкиот тим, добро ги познава мааните на Брера. Дарко Додев го отвори резултатот во седмата минута, Марко Ѓорѓиевски зголеми на 2-0 во 20.минута.
Ѓорѓиевски погоди и на почетокот на вториот дел, а потоа и во 71.минута комплетирајќи хет-трик. Тиквеш ја победи Воска Спорт со 2-1. Едиз Спахиу го отвори резултатот во 30.минута, а во 64.минута уште еднаш се запиша во листата на стрелците. Воска Спорт намали со погодокот на Абдулхади Јахја во 76.минута од мечот.
