Во кампот на Полска сметаат дека победата на денешниот натпревар со Холандија на ЕВРО 2024 е возможна, иако лидерот на тимот, Роберт Левандовски, многу ќе недостасува на овој дуел.
35-годишниот Левандовски, кој има 82 гола во 150 натпревари за Полска, ќе недостасува во стартниот состав поради повреда на препоните, но ќе биде на клупата и веројатно може да игра на следните натпревари со Австрија и со Франција.
„Многу жалам што Роберт Левандовски нема да може да ни помогне во овој натпревар“, изјави играчот од средниот ред, Пјотр Зјелински, по тренингот во Хамбург. „Тој е светска класа и ќе ни недостасува. Но, ние останатите треба да дадеме нешто дополнително за да победиме“, додаде вториот капитен.
Селекторот Михаил Пробиерж смета дека отсуството на голгетерот е можност за другите да блеснат.
„Нема што да криеме, ќе ни недостасува Левандовски. Но, другите треба да направат сè што можат за да постигнеме добар резултат“, истакна предводникот на Полска.
