Победа го сопре Шкупи, но Струга ТЛ гази се пред себе

Македонскиот првак Шкупи ремизираше 1-1 против Победа на Чаир. Тоа е прво реми за тимот на Гоце Седлоски во новата сезона, а и прв бод за Победа која се врати во елитата.

Реналдо Цефас во 81.минута донесе водство за Шкупи, а три минути подоцна израмни Иван Галевски. Седлоски го стартуваше мечот без Фреди Алварез со намера да го одмори, но реалноста е дека Шкупи без него е сосема поинаков тим. На крајот, два бода „одлетаа“ од Чаир, а можеше да ги врати Данфа во 85.минута кога промаши супер-шанса од неколку метри.

Затоа пак Струга ТЛ не запира и гази се пред себе.

Со фудбалер помалку, поради исклучувањето на Дарко Илиески, стружани го победија Силекс со 2-1. Бесарт Ибраими од пенал донесе предност во 31.минута, а израмни Марјан Ристовски во 72.минута. Само две минути подоцна Илиески доби црвен картон, но Буњамин Шабани донесе триумф со голот во 82.минута.

Академија Пандев беше убедлива против Скопје и славеше со 3-0, а Шкендија го победи Тиквеш во Кавадарци со 1-3. Митровски во 12.минута го отвори резултатот за „пандевци“, а во финишот погодија и Цикарски и Трајков.

Во Кавадарци, Едиз Спахиу го изненади гостинот со гол во 19.минута, но брзо возврати Ферхан Хасани, а Бруно Дита се погрижи за пресврт до полувремето. Љупчо Дориев до голот во 58.минута ја потврди победата на Шкендија.

Македонија ЃП и Работнички ремизираа 1-1 во Ѓорче Петров. Крсте Велкоски во 49.минута донесе водство за „романтичарите“, а израмни Фахрудин Ѓурѓевиќ во 63.минута. Во 88.минута, Дин Аломеровиќ ја погоди гредата.

ПРВА ЛИГА, 5.КОЛО – РЕЗУЛТАТИ

ШКУПИ – ПОБЕДА 1-1

СТРУГА ТЛ – СИЛЕКС 2-1

АКАДЕМИЈА ПАНДЕВ – СКОПЈЕ 3-0

ТИКВЕШ – ШКЕНДИЈА 1-3

МАКЕДОНИЈА ЃП – РАБОТНИЧКИ 1-1