Тренерот на Милан, Стефано Пиоли, останува резервиран и покрај важната победа од 4-0 на гостувањето кај Динамо Загреб. На италијанскиот шампион му треба само бод во последната средба со Салцбург за да се пласира во осминафиналето на ЛШ.
„Дали ова беше нашиот најдобар натпревар во Лигата на шампионите? Имавме тежок почеток, но како одминуваше времето станувавме се поопасни и создававме многу шанси. Сепак, важно е што направиме уште еден чекор и ќе се обидеме да ги израдуваме нашите навивачи. Знаевме дека нема да биде лесно и не смеевме да си дозволиме да го потцениме противникот. Сакаме да одиме напред, во нокаут фазата, што не можевме да го направиме минатата сезона“, изјави Пиоли.
Тој веднаш се фокусира на следниот меч од Серија А.
„Сега размислуваме само за натпреварот со Торино. Се уште не треба да бидеме фокусирани на Салцбург, а уште помалку на тоа дека и реми ќе ни биде доволно за да се пласираме во осминафиналето“, изјави тренерот на Милан.
