По Бразил кој одигра 1-1 против Венецуела, падна уште еден великан. „Селесао“ не успеа да ја победи Венецуела, но уште поголемо изненадување е поразот од 2-1 на светскиот шампион на гости кај Парагвај. Неверојатно звучи податокот дека примија два гола од Парагвај – тим кој е познат по својата неефикасност. Имено, домаќините до овој натпревар, во 10 мечеви, постигнаа само четири гола.
Гостите започнаа добро. Лаутаро Мартинез го скрши малерот што го следеше оваа сезона во Интер, постигнувајќи гол по десетина минути, а по ВАР проверка, голот беше потврден.
Но, радоста на Аргентинците траеше само десетина минути. Тони Санабрија од Торино со ножички го зафати центаршутот на Густаво Веласкез, оставајќи го Дибу Мартинез немоќен. Тоа им даде крила на домаќините, кои на стартот од второто полувреме поведоа преку Омар Алдерете. Центаршутот го испрати соиграчот на Меси од Мајами, Диего Гомез, а Алдерете на вториот дирек со удар со глава го претвори во гол за победа.
Аргентинците се мачеа да создадат изгледни шанси и да избегнат пораз. Најдобрата шанса ја имаше Тати Кастељанос, но напаѓачот на Лацио ја прокоцка можноста по добро додавање од невообичаено тивкиот Меси.
Иако беше поразена, Аргентина останува на врвот со 22 бода, но Колумбија може да ги стигне ако победи вечерва во Монтевидео.
Парагвајците со победата се искачија на шестото место, кое обезбедува директен пласман на Светското првенство.
Еквадор сега е петти, откако ја совлада Боливија со 4-0. Двата гола на Гонзало Плата беа клучни, а претходно погоди ветеранот Енер Валенсија од пенал. На крајот, Алан Минда ги постави конечните 4-0.
