Последнопласираниот во Бундес-лигата, тимот на Бохум, се раздели со тренерот Петер Цејдлер по само осум натпревари, а спортскиот директор Марк Летау исто така го напушти клубот. 62-годишниот Цејдлер пристигна летово, но не успеа да оствари ниту една победа во своите осум натпревари како тренер на Бохум.
Тимот загуби шест од седумте натпревари во Бундес-лигата и одигра нерешено, но и испадна од Купот на Германија.
Ова е првата тренерска смена оваа сезона во Бундес-лигата.
„Недостасува убеденост дека Бохум може да ја постигне својата цел за опстанок во лигата со тековната поставеност. И покрај многуте дискусии и напори во последните недели, не успеавме да направиме значителни подобрувања во спортскиот аспект и на табелата“, се вели во соопштението на клубот.
Според информации во германските медиуми, фаворит за позицијата е поранешниот тренер на Шалке 04, Андре Брајтенрајтер. Новиот тренер на Бохум ќе има тежок старт, бидејќи следни противници на тимот се лидерот Баерн Минхен, Ајнтрахт Франкфурт, шампионот Баер Леверкузен и вицешампионот од минатата сезона, Штутгарт.
Минатата сезона, Бохум го избегна испаѓањето преку плејоф, во кој ја победи Фортуна Диселдорф, по пенали.
