Македонскиот првак Струга Трим Лум доживеа пораз (3-1) од Пјуник во Ереван што значи и елиминација од европските натпреварувања за оваа година. Тренерот Ќатип Османи, секако не е задоволен и на прес – конференцијата го даде своето мислење за настапот во квалификациите на Конференциската лига.
Иако амбициите беа многу поголеми, Струга ТЛ го заврши европскиот пат во второто квалификациско коло.
„Во првото полувреме не бевме на потребното ниво. Дозволивме премногу простор за противникот да не нападне блиску до нашиот гол и како резултат на тоа примивме и два гола. Со помош на Ибраими успеавме да се вратиме на крајот од првото полувреме. Второто полувреме можам да кажам дека беше израмнето, се обидувавме неколку пати да ја загрозиме противничката мрежа, но без успех. На крајот се случи тоа што се случи, примивме и трет гол, кој нѐ елиминира од европските натпреварувања“, изјави тренерот Ќатип Османи.
Денешниот натпревар против Пјуник беше јубилеен 30-ти за тренерот на Струга ТЛ во европските натпреварувања.
