Натпреварот меѓу Реал Сосиедад и Барселона (1-0) предизвика многу дискусии. Причината за тоа е поништениот гол на Роберт Левандовски. Полјакот ја погоди мрежата на противникот во 13. минута, но голот му беше поништен поради исклучително мал офсајд.
Офсајдот беше досуден од полуавтоматскиот систем на стадионот, а судијата Гијермо Квадрадо Фернандес ја потврди оваа одлука, иако останаа сомневања дека системот можеби погрешно ја евидентирал позицијата и ја зел предвид копачката на дефанзивецот Наиф Агер, а не на Левандовски.
Сепак, повеќето мислења во Шпанија ја поддржаа оваа одлука.
„Во вакви ситуации, одлуките ги носи машината, така што нема човечки фактор. Штом полуавтоматскиот систем вели дека има офсајд, нема што повеќе да коментираме“, изјави поранешниот судија Итуралде Гонзалес.
Техничкиот комитет на судиите е со исто мислење. Тие внимателно ги прегледале сите снимки од ситуацијата и не гледаат грешка во одлуката, не прифаќајќи го тврдењето дека машината ја евидентирала погрешната нога.
Спорниот момент е снимен од десет камери кои можат јасно да ги распознаат нозете на фудбалерите, иако на 3D сликата што ја гледаат телевизиските гледачи тоа е потешко да се разликува.
„Овој кадар е направен од машина, а не од човек. На стадионот се поставени над 30 камери кои ја следат топката и секој фудбалер. Кадарот го покажува моментот кога додавачот игра со топката. На првиот момент јасно се гледа дека копачката на Левандовски, која е жолта, е малку пред другата. Десет стотинки подоцна, на следниот кадар, се гледа копачката на Агер пред онаа на Левандовски, и токму овој кадар стана предмет на толку многу дискусии на социјалните мрежи. Но, тој го покажува подоцнежниот момент од играта. На крајот на краиштата, по толку многу судиски грешки, треба да и веруваме на технологијата, која не може да погреши. Машината го направила кадарот малку порано од кадарот што се рашири на социјалните мрежи“, додаде Итуралде Гонзалес за „АС“.
