Весли Фофана дефинитивно ја заврши сезоната откако Челси потврди дека 24-годишниот дефанзивец успешно бил опериран. Операцијата е извршена во Лондон, а од клубот велат дека тоа било неопходен чекор за да се реши хроничниот проблем на бутниот мускул со кој Французинот се соочуваше подолго време.
Фофана се врати на теренот во март по пауза од три месеци поради истата повреда, но проблемите продолжија и покрај напорите за конзервативно лекување. Сега му претстои рехабилитација со специјално прилагодена програма што ќе започне следната недела во тренинг-центарот во Кобам.
Ова е уште еден тежок удар за Челси, бидејќи Фофана оваа сезона одигра само 14 натпревари, постојано ограничуван од повреди. Последниот натпревар за клубот му беше во поразот од Арсенал (0-1) пред паузата за репрезентативни настапи во март.
Повредите продолжуваат да бидат голем проблем за „сините“ оваа сезона, особено во дефанзивната линија, каде веќе неколку играчи имаат долготрајни отсутства.
