Фудбалерот на Лајпциг, Кристофер Нкунку, го одработи првиот тренинг со тимот, првпат откако се повреди на 15 ноември поради што го пропушти Светското првенство во Катар.
На видеото објавено на Твитер профилот на Лајпциг, може да се види Нкунку како трча и и вели на камерата: „Конечно се вратив“.
Францускиот фудбалер сепак само се загреваше и изведе неколку вежби, но не го одработи целиот тренинг.
Неговото враќање доаѓа две недели пред првиот осминафинален натпревар во Лигата на шампионите помеѓу Лајпциг и Манчестер Сити. Сепак, сѐ уште не е доволно подготвен за настап.
Нкунку го повреди коленото на тренингот на француската фудбалска репрезентација непосредно пред почетокот на Светското првенство.
