Александар Ставрев, најдобриот македонски фудбалски судија, денеска ја заврши својата блескава кариера со последниот натпревар во Првата фудбалска лига. Натпреварот помеѓу Пелистер и Беса, одигран во Битола, беше неговата проштална судиска задача, каде што се појави како главен арбитар.
Ставрев, кој се смета за еден од најдобрите судии што Македонија ги имала, има импресивна кариера зад себе. Тој судеше натпревари во најелитните европски натпреварувања како Лигата на шампионите и Лигата на Европа, како и бројни квалификациски натпревари.
Заедно со Ставрев, од судиската професија се прости и помошниот судија Дејан Костадинов, за кого ова беше последен натпревар како дел од судискиот тим.
Пред почетокот на натпреварот, претседателот на ФК Пелистер, Митко Стојковски, им врачи пригодни подароци на Ставрев и Костадинов како благодарност за нивниот долгогодишен придонес кон македонскиот фудбал.
Натпреварот заврши со победа на Пелистер од 1-0, но денот беше во знакот на значајното простување за Ставрев и за Костадинов.
