Нема поединец во таборот на македонската репрезентација кој овде во Тбилиси не верува во триумф на денешниот натпревар против Грузија во второто коло од Лигата на нациите. Огромни се желбите меѓу избраниците на Игор Ангеловски да се продолжи со победите и покрај тоа што е јасно дека не очекува тежок противник кој еднакво атакува на трите бода.
„Знаеме дека не чека тежок противник, Грузија е можеби и благ фаворит поради домашниот терен но ние исто така атакуваме на победа. Верувам дека ќе одиграме и подобро од изданието против Ерменија во Скопје, па со бодови ќе го завршиме овој прв мини-циклус од Лигата на нациите. За нас ова натпреварување секако е важно, затоа што целите се повторно да се бориме за првото место во групата“ – вели дефанзивецот на унгарски Мол Види, Висар Муслиу.
Натпреварот меѓу Грузија и Македонија на националната арена „Динамо“ во Тбилиси се игра со почеток од 18 часот.
