Жозе Мурињо го пофали Интер и му посака да го освои „скудетото“ откако неговата Рома синоќа беше поразена со 3-1 на „Џузепе Меаца“.
Тимот на Мурињо практично остана без Лигата на шампионите, Јувентус сега делува недостижно на четвртото место, но за утеха „Специјалниот“ сака неговиот поранешен клуб Интер да биде шампион.
„Интер е Интер, тие се најдобриот тим во Серија А со играчи одлични во секој поглед, со должна почит, во нивниот тим има многу „животни“ – на добар начин!“, рече Мурињо, додавајќи:
„Моравме да бидеме совршени за да ги спречиме, а не бевме совршени. На 0-0 имавме одлична можност преку Манчини, а десет секунди подоцна ни дадоа гол. Вториот гол дојде откако ја загубивме топката. Недостаток на концентрација и самодоверба имаше на 15 минути пред полувремето. Претпочитам да губам по три месеци од тим кој е посилен од нас, па немам што да им кажам на играчите“, изјави Жозе.
„Да се соочивме со тимот од средината на табелата, сигурно ќе победевме. Интер тактички се многу паметни и умешни. Ако им создадете проблем, ќе најдат начин да го заобиколат“, смета Португалецот.
На крајот рече дека го сака Интер и сака овој тим да победи на секој натпревар до крајот на шампионатот.
„Очигледно веќе немаме натпревари против Милан, Интер или Наполи, па можам да кажам дека би сакал овој Интер да го освои „скудетото“. Не можев да го кажам тоа порано затоа што сепак бев платен да победувам со Рома, но сега можам“, заврши Мурињо во свој стил, чија Рома сега оди кон финалето на Лигата на конференциите.
Што се однесува до борбата за Скудетото, таа се уште е отворена. Интер има бод повеќе од градскиот ривал Милан, кој вечерва гостува кај Лацио, а се е во рацете на „нероаѕурите“ затоа што треба да го одигра и преостанатиот меч со Болоња.
