Српскиот стратег Младен Крстајиќ е новиот селектор на фудбалската федерација на Бугарија. Тој на официјална прес-конференција беше промовиран на новата функција. Ова значи Крстајиќ ќе го предводи бугарскиот национален тим на мечот против Македонија во Скопје, во Лигата на нации.
Договорот на Крстајиќ е на две години, а во неговиот штаб се помошниците Стефан Јанковиќ, Немања Милинчиќ, Иван Иванов, како и тренерот на голманите Дарко Бојовиќ.
„Нашата работа е таква што понекогаш работиме во клуб или во репрезентација. Откако поминавме добро во Тел Авив, добивме многу понуди. По разговорите со Борислав Михаилов решивме да го прифатиме овој предлог. Бугарија е земја со многу спортски успеси. Има многу талентирани млади луѓе и тоа ја сврте вагата за да се согласиме да дојдеме овде. Уште кога ја прифативме понудата, почнавме да ги гледаме бугарски фудбалери. Сите знаеме во каква состојба е бугарската фудбалска репрезентација и какви се резултатите во последно време. Има многу млади талентирани фудбалери кои ја загубија самодовербата. Ќе се обидеме тоа да го исправиме“, изјави Младен Крстајиќ.
