Фудбалската репрезентација на Македонија одигра 1-1 против Италија и потврди дека е нерешлива енигма за актуелниот европски првак.
Селекторот Благоја Милевски го порази Роберто Манчини во Палермо, а сега не загуби и новиот предводник на „аѕурите“, Лучијано Спалети.
„Морам да искажам честитки за момците. Не се сомневав дека сега ќе бидеме тркачки многу поспособни. Тој термин во јуни е многу „опасен“, посебно за нас, фудбалерите имаа завршена сезона, дел од нив знаеме каква им е ситуацијата во клубовите. И сега имавме проблеми, но се подготвивме добро. Имаше критики, јас секогаш гледам позитивно на нив, затоа што мотивираат и треба да бидеме подобри на секој нареден натпревар. Најважно е да бидеме чесни кон македонскиот дрес и да играме со срце. И сега велам, освоивме бод против Италија, но не сме направиле ништо ако не ја победиме Малта на следниот меч“, изјави селекторот Благоја Милевски.
