Италијанскиот калчолигаш Милан е во напредни преговори со Сасуоло за трансфер на крилниот напаѓач Доменико Берарди, пишува „Газета дело Спорт“. Засилувањето на десната крилна позиција во нападот на тимот е меѓу приоритетите на „росонерите“, а токму Берарди е прв избор на раководството на клубот за оваа позиција.
Цената на италијанскиот репрезентативец е 30 милиони евра, а Милан е подготвен да ја плати оваа сума.
27-годишниот фудбалер има одлична сезона со 14 гола и 15 асистенции во 29 натпревари во Серија А. Покрај тоа, Милан се насочи кон уште еден фудбалер на Сасуоло, напаѓачот Џанлука Скамака.
