Првиот голман на Милан, Мајк Мeњан, кој минатиот викенд се здоби со повреда на листот, ќе го пропушти вечерашниот натпревар против Удинезе во четвртото коло од Серија А, потврди тренерот Масимилијано Алегри.
„Мајк е добро и смирен. Очекувам да се врати на терен во вторник против Лече“, изјави Алегри на прес-конференцијата.
Францускиот голман беше заменет во 52. минута против Болоња поради проблеми со десниот лист. Од неговото пристигнување во Милан во 2021 година, 30-годишниот Мeњан имаше неколку повреди, вклучувајќи и тешка која го спречи да настапи на Светското првенство 2022.
Алегри нема да може да смета ниту на Рафаел Леао, кој уште во првото коло од Купот на Италија се повреди на листот и досега не одиграл ниту еден натпревар во Серија А. Сепак, тренерот се надева дека Португалецот ќе биде подготвен за дуелот со Наполи следната недела.
По три кола, Милан е петтопласиран на табелата со шест бодови, три помалку од лидерот Наполи.
