Фудбалерите на Манчестер Јунајтед се подготвуваат за финалето од Лигата на Европа против Вилјареал на 26 мај во Гдањск. Хендикеп за „ѓаволите“ е што тие најверојатно нема да можат да сметаат на својот капитен Хари Мекгваер. Причината за неговото отсуство е повредата на лигаментите на скочниот зглоб.
Оваа вест ја потврди и менаџерот, Оле Гунар Солскјер.
„Хари може да оди, но, искрено, далеку е од трчање. Не верувам дека ќе го видиме во Гдањск. Сепак, како што реков и претходно, ќе го чекаме вторник навечер, кога го имаме последниот тренинг, па ќе видиме дали може да излезе на теренот. Закрепнува полека, но на лигаментите им е потребно подолго време да заздрават. Тој е многу важна фигура во соблекувалната, лидер. Пред да се вратат навивачите, верувам дека можевте да го слушнете од трибините. Тој ќе биде со нас, ќе биде во соблекувалната и ќе се погрижи сите да бидат подготвени за финалето“, изјави Солскјер.
Убава вест за Јунајтед е дека повредениот Антони Марсијал најверојатно ќе биде подготвен за финалето.
