Брани во голем стил од почетокот на сезоната, а на секој натпревар е подобар. Младинскиот репрезентативец Ристо Јанков блескаше и на дуелот меѓу Шкендија и Работнички во Тетово. Со неколку фантастични одбрани ги одржа „романтичарите“ во живот, а на крајот Работнички успеа да освои бод на жешкиот терен во Тетово.
Скроти неколку удари на Бесарт Ибраими, Љупчо Дориев, Валон Ахмеди, во вистински момент му даде импулс на тимот да издржи, а потоа следеше израмнувачкиот погодок на Лука Станковски. Во завршницата исто така се испречи пред Дориев кој имаше одлична шанса.
Со своето издание на мечот против Шкендија, голманот на Работнички, Ристо Јанков, го заслужи епитетот играч на 10.коло во Првата фудбалска лига во изборот на МАКФУДБАЛ. Тој имаше сериозна конкуренција и во младинскиот репрезентативец од Македонија ЃП, Арби Воша, кој блескаше против Академија Пандев.
Во следното коло, Јанков и Работнички имаат ново искушение против Шкупи.
