Македонскиот прволигаш Македонија ЃП ја заокружи првата фаза од подготовките во Скопје и денеска отпатува за Аланија каде ќе продолжи со подготовките.
Во турскиот туристички центар „лавовите“ ќе одиграат шест пријателски натпревари низ кои тренерот Жикица Тасевски треба да го дефинира стартниот состав за пролетниот дел од шампионатот.
Македонија ЃП закажа пријателски натпревари со Олександрија, Инхулетс, Монтана, ЦСКА 1948, Минај и со Олимпик Доњецк.
Во тимот на Македонија ЃП досега пристигнаа четири засилувања во зимскиот преоден рок.
Нови аквизиции кај ѓорчепетровци се Чарлестон, Робсон да Силва, Изет Ајрулаху и Самир Фазли.
Македонија ЃП има амбиции за излез на европска сцена со оглед на третата позиција на табелата по есенската полусезона. „Лавовите“ се надеваат дека со добри подготовки би можеле сериозно да се вмешаат и во трката за шампионската титула.
