Мајнц го раскина договорот со крилниот напаѓач Анвар Ел Гази, поради пораката на играчот на социјалните мрежи во која тој покажа поддршка за палестинскиот народ.
Германскиот бундеслигаш го суспендираше Ел Гази од тимот по контроверзната објава на Инстаграм, но таа суспензија беше укината во понеделникот со образложение дека фудбалерот „се покаја за своите постапки“ и дека ќе продолжи да му стои на располагање на тренерот.
Сепак, во петокот клубот излезе со соопштение во кое потврди дека договорот на Ел Гази е раскинат, а Холанѓанецот со мароканско потекло веќе не е член на Мајнц.
„Мајнц 05 веднаш го раскинува договорниот однос со Анвар Ел Гази“, се наведува во соопштението на клубот објавено вчера.
По одлуката на клубот, Ел Гази брзо се огласи на социјалните мрежи со следниве зборови:
„Застанете зад она што е исправно, дури и ако тоа значи да останете сами“.
