Фудбалерите на Манчестер Сити како гости ремизираа 1-1 против Лајпциг во првиот осминафинален натпревар од Лигата на шампионите. Овој меч најмногу ќе го памети напаѓачот на „граѓаните“ Ријад Махрез, кој погоди за Сити и го запиша своето име во историјата на фудбалот во Африка.
Алжирецот во Лајпциг го постигна 20. гол во Лигата на шампионите и со тоа стана петтиот африкански фудбалер кој постигнал 20 или повеќе голови во елитното европско клупско натпреварување.
Најдобри на оваа листа се актуелниот фудбалер на Ливерпул, Мохамед Салах од Египет и легендата на Челси и Брегот на Слоновата Коска, Дидие Дрогба, кои постигнаа по 44 гола во елитата.
Зад нив е камерунскиот напаѓач Самуел Ето, кој се прослави во Барса и Интер, со кои беше шампион на Европа, а во Лигата на шампионите постигна точно 30 гола.
Сенегалецот Садио Мане, поранешен играч на Ливерпул кој минатото лето се пресели во Баерн Минхен, постигна три гола помалку од Ето.
