Фудбалската федерација на Шпанија го продолжи договорот со селекторот на машката репрезентација, Луис де ла Фуенте, за уште две години, до завршувањето на Европското првенство во 2028 година.
„Де ла Фуенте ќе ја води машката репрезентација до крајот на Европското првенство во 2028 година, кое ќе се одржи во Обединетото Кралство и Ирска“, се наведува во соопштението на Федерацијата.
Претходниот договор на Де ла Фуенте истекуваше во 2026 година, по завршувањето на Светското првенство во САД, Мексико и Канада.
Тој ја презеде селекторската функција од Луис Енрике во декември 2022 година, по елиминацијата на Шпанија во осминафиналето на Светското првенство во Катар.
Претходно, Де ла Фуенте беше тренер на младата репрезентација на Шпанија и олимпискиот тим, со кој освои сребрен медал на Олимписките игри во Токио во 2021 година.
Со сениорската репрезентација на Шпанија, минатото лето триумфираше на Европското првенство во Германија, а една година претходно ја освои и Лигата на нации.
