Првиот голман на Ливерпул, Алисон Бекер, ќе биде надвор од терените најмалку шест недели, објави „Скај Спортс“. Се покажа дека неговата повреда на препоните е посериозна од првичните прогнози, поради што тој ќе биде подготвен за игра дури по репрезентативната пауза во ноември.
Ова значи дека Бразилецот би можел да се врати на теренот најрано на 24 ноември, за време на гостувањето против Саутемптон, пропуштајќи седум натпревари на „црвените“, вклучувајќи ги и тие против Челси, Арсенал, Астон Вила и Баер Леверкузен.
Алисон се повреди за време на последниот натпревар против Кристал Палас. Тој веќе имаше една повреда во септември, кога имаше проблеми со бутниот мускул.
Голманот исто така нема да биде дел од претстојните квалификациски натпревари на Бразил за Светското првенство против Чиле, Перу, Венецуела и Уругвај.
