Одбранбениот играч на Лече, Патрик Доргу, многу веројатно ќе биде првото ново засилување за менаџерот Рубен Аморим во Манчестер Јунајтед. Двата клуба веќе ги договориле сите детали околу трансферот, кој се очекува секој момент да биде официјално финализиран.
Не е позната точната сума што „црвените ѓаволи“ ќе ја платат за младиот Данец. Според „Газета дело Спорт“, таа ќе изнесува 38 милиони евра, од кои 33 милиони ќе бидат загарантирани, а остатокот ќе биде во форма на бонуси.
Доргу веќе го пакува багажот за да отпатува во Манчестер, каде што ќе ги мине задолжителните медицински прегледи и ќе го потпише договорот со англискиот гигант. Договорот ќе биде на пет години, а неговата плата ќе изнесува околу 1 милион евра по сезона.
Ова ќе биде најскапата продажба во историјата на Лече, со оглед на тоа што сумата е речиси двојно поголема од досегашниот рекорд, кој го држеше Мортен Хјулманд, за кого Спортинг Лисабон плати 19,5 милиони евра во 2023 година.
Во меѓувреме, италијанскиот клуб веќе се пофали со ангажманот на двајца дефанзивци, Данило Веига и Тијаго Габриел, што дополнително ја олесни разделбата со Доргу.
