Раководството на Барселона сè уште не одлучило околу евентуалниот отказ на тренерот Роналд Куман, објавија голем број медиуми во Шпанија. Според нив, не треба да се очекува итна смена на холандскиот фудбалски стратег и покрај синоќешниот убедлив пораз од Бенфика во Лигата на шампионите. Каталонците загубија со 3-0 и запишаа втор убедлив пораз по две рунди во ЛШ.
Куман најверојатно ќе продолжи да работи до крајот на неделата. Во сабота Барселона на домашен терен ќе игра против Атлетико Мадрид. По оваа средба, одлуката околу тренерската позиција ќе биде донесена за време на репрезентативната пауза.
Барселона ги загуби двата први натпревари во Лигата на шампионите и е последнопласирана во групата Е без освоен бод. Лидер е Баерн Минхен со шест бода, Бенфика има четири, Динамо Киев е третопласиран со еден освоен бод.
