Тренерот на Наполи, Антонио Конте, изјави дека би било чудо доколку тимот ја освои титулата, но тоа не значи дека нема да се стреми кон неа. Синоќа, „партенопеите“ го победија Милан со 0-2 на „Сан Сиро“ и сега водат во Серија А со предност од седум бода пред второпласираниот Интер.
„Не се криеме, но се обидуваме да бидеме реални. Досегашните резултати се фантастични, не си замислував ваков старт. Имам одредени успеси зад себе, што носи очекувања. Нашата цел е да се вратиме во европските натпреварувања. Мислам дека Наполи не учествувал во нив за првпат по 14 години. Има уште пет или шест тимови со иста амбиција. Да не заборавиме дека минатата сезона завршивме со 41 бод помалку од шампионот. Сакам навивачите да сонуваат, но исто така да бидеме со нозете цврсто на земја“, истакна Конте.
Тој исто така го пофали тимот за колективната игра и за единството.
„Само за четири месеци изградивме цврста основа, и слободно можам да кажам дека индивидуалците се подредени на тимот. Ова е еден од најдобрите состави што сум ги имал во кариерата. Атмосферата е одлична, а тоа е предуслов за успех. Луѓето во Неапол се многу емотивни, и деновите после натпревар се тешки ако тимот не победи. Сакам навивачите да бидат горди на фудбалерите и сметам дека сега имаат причина за тоа“, додаде Конте.
За Лукаку, Конте изјави дека двајцата имаат одличен однос.
„Ромелу беше подготвен на сѐ за да дојде во Неапол. Тој ја намали својата плата и одби понуди од Англија, сето тоа за повторно да работиме заедно. Тој е одлично момче, а и целокупниот тим е составен од играчи кои се подготвени да се жртвуваат за дресот на Наполи“, заврши Конте.
