Тренерот на Милан, Серџо Консеисао, беше видно разочаран по поразот со 0-1 од Аталанта во натпревар од Серија А. И покрај поразот, Консеисао одби да зборува за својата иднина во клубот и остана фокусиран на претстојниот реванш во полуфиналето на Купот на Италија против Интер.
„Првото полувреме беше израмнето. Аталанта имаше повеќе посед на топката, но ние немавме сериозни проблеми во одбраната. Стоевме малку подлабоко отколку што планиравме, но завршивме добро, создадовме неколку ситуации во кои ни недостасуваше само последното точно додавање“, изјави Консеисао.
Во второто полувреме, Милан започна поенергично, но по првата вистинска шанса на Аталанта, гостите успеаја да постигнат гол. Тоа беше момент на невнимание кој ги чинеше „росонерите“ важни бодови во трката за висок пласман.
„Знаевме дека Аталанта напаѓа преку центаршутеви кон вториот дирек. Зборувавме за тоа, трениравме токму за тие ситуации, но, сепак, примивме гол“, додаде тренерот на Милан.
Консеисао исто така изрази незадоволство од ефектот на резервните играчи, кои, според него, овојпат не ја донеле потребната енергија.
„Откако пристигнав во Милан, дури и по освојувањето на Суперкупот и победата против Калјари во мојот прв натпревар во Серија А, постојано се зборуваше за можни нови тренери. Јас се фокусирам на работата и на тимот“, заврши Португалецот со доза на горчина.
Следниот натпревар на Милан е реваншот против Интер во полуфиналето на Купот на Италија, каде „росонерите“ ќе имаат шанса да се борат за втор трофеј оваа сезона.
