Тренерот на Баерн Минхен, Венсан Компани, зборуваше пред медиумите во пресрет на утрешното гостување кај Бохум, при што, логично, главниот акцент беше тешкиот пораз на баварците со 1-4 од Барселона во Лигата на шампионите оваа недела.
„Мислам дека има натпревари во кои работите се јасни веднаш по крајот на натпреварот. Ова беше натпревар со многу моменти, не беше сѐ што направивме погрешно, но имаше и моменти кога едноставно бевме неконцентрирани и не ги искористивме. Во првото полувреме примивме три гола, што не беше идеално, но сепак бевме опасни. Имав чувство дека можеме да победиме со 4-3 или 5-4. Првото полувреме не беше со добар резултат, но вербата кај момците беше присутна. Во второто полувреме играта малку се промени. Мора да признаеме дека Барселона беше подобра. Ова беше категоричен пораз“, започна тој.
Тренерот на Баерн го заштити и Мануел Нојер, кој беше критикуван за своите последни настапи.
„Загубивме. Кога губиме, губиме заедно, не само Ману, туку и целиот тим и тренерите. Тоа е важно. Ако Ману ја промени својата игра, тоа е само за да стане уште подобар. Критиката е дел од ова, но се надевам дека ќе бидеме успешни против Бохум“, истакна стратегот на Баерн Минхен.
