Капитенот на Белгија, Кевин де Бруин, е на пат да се откаже од настапите за националниот тим. Според информации од Белгија, челниците на федерацијата се загрижени дека 33-годишниот играч од средниот ред на Манчестер Сити е блиску до одлуката да ги заврши своите настапи во репрезентативниот дрес.
Де Бруин ги критикуваше своите соиграчи по поразот од Франција во Лигата на нации. Белгијците загубија со 0-2 во Париз, а капитенот на селекцијата го изрази своето незадоволство од однесувањето на некои од фудбалерите.
Селекторот Доменико Тедеско следната недела ќе патува за Манчестер за да разговара со Де Бруин. Белгиските медиуми наведуваат дека би било добро емоциите на играчот да се смират пред тој да ја донесе конечната одлука.
Кевин де Бруин дебитираше за белгискиот национален тим во 2010 година и досега има одиграно 107 натпревари и постигнато 30 гола.
