Македонскиот прволигаш Ренова на охридското крајбрежје се подготвува за пролетните искушенија, а тренерот Ќатип Османи кој ја презеде екипата при крајот на есента сега има можност самиот да го селектира тимот и добро да го подготви за тоа што следува. „Гипсарите“ покажаа ефикасност на последниот тест против Велешта, а Османи вели дека најважно е што во овој период сите се здрави и тренираат максимално.
„Задоволен сум од текот на подготовките. Сите фудбалери се здрави и максимално се работи за некој тренинг. Тоа е најважно за овој период. Одигравме и неколку пријателски натпревари низ кои полека се дефинира тимот на Ренова за вториот дел од првенството. Целта е јасна, да ги избегнеме долните позиции на табелата, заедно со баражот и што е можно побрзо да излеземе кон средишниот дел. Нема да биде лесно, затоа што речиси сите клубови се во таа битка, од четвртата позиција, па се до последното место“, вели за Макфудбал, тренерот на Ренова, Ќатип Османи.
Тимот од Џепчиште е познат по тоа што не менува многу, ростерот неколку години игра заедно. Оваа зима доведени се неколку засилувања за кои Османи вели дека добро се вклопуваат во составот.
„Доведовме неколку засилувања на позициите каде што бевме „тенки“. Засега се оди добро, тие добро се вклопуваат во целината. Остануваат уште десетина дена, а потоа првенството ќе покаже како сме работеле бидејќи резултатите се единственото мерило.“
Ренова по есенскиот дел од сезоната се наоѓа на деветтата позиција на табелата со 19 освоени бода.
