Како во старите добри времиња… Вардар – Пелистер на Градски…Двата тима се во обид да го вратат некогашниот сјај

Најтрофејниот македонски клуб Вардар вечерва (20 часот) го пречекува Пелистер во дербито на второто коло од Првата лига. По подолг период „вечното дерби“ на македонскиот фудбал е повторно на сцена, а двата тима треба да прикажат игра која ќе го врати стариот некогаш сјај.

Вардар немаше старт каков што посакуваше, загуби од Брера со 3-1, а играта ниту од далеку не беше според желбите на „црвено-црните“ фанови, а сигурно и според плановите на тренерот Горазд Михајлов.

Убаво е да се носи дресот на Вардар, но од друга страна е и дополнителна тежина. Тоа го знаат само малкумина од овој тим, оние староседелците кои минаа и низ мачни денови за спас на клубот. Вардар доведе и неколку засилувања, но засега само Горан Закариќ ја оправдува улогата на квалитетна аквизиција, можеби заедно со партнерот од нападот Џибрил Дианеси.

Вардар е фаворит според букмејкерите на вечерашниот меч, а Пелистер доаѓа со желба да остане непоразен, иако изрази негодување дека правдата ќе ја дели скопски судија, Игор Стојчевски.

Пелистер на стартот одигра 1-1 против Гостивар на стадионот „Петар Милошевски“, па и битолчани бркаат прва победа во новата сезона.

За атмосферата треба да се погрижат двете навивачки групи, Комити и Чкембари, кои цела седмица се подготвуваат за своето издание како дел од ова дерби.