Менаџерот на Манчестер Сити, Пеп Гвардиола, ја потврди лошата вест која веќе беше предвидена од медиумите на Островот. Сезоната за Родри е завршена. Шпанецот се здоби со сериозна повреда на десното колено за време на дербито со Арсенал минатиот викенд. Подоцна беше потврдено дека има оштетени предни вкрстени лигаменти.
Од клубот не открија колку време ќе му биде потребно за опоравување, но денес Гвардиола објави дека 28-годишниот играч од средниот ред веќе бил подложен на операција и ќе ги пропушти сите натпревари до крајот на сезоната.
„Тој утрово беше опериран. Предни вкрстени лигаменти и менискус. За жал, ги доби најлошите вести, но таков е фудбалот на ова ниво. Понекогаш вакви работи се случуваат. Ние само треба да го поддржуваме во процесот на рехабилитација, чекор по чекор. Кој ќе го замени? Го имаме Матео Ковачиќ и уште неколку опции. Илкај Гундоган може да игра на таа позиција, како и Џон Стоунс. Дали ќе се обидеме да најдеме замена во јануарскиот преоден рок? Ќе разговараме за тоа и ќе видиме како ќе се справиме. Ќе мора да почекаме“, изјави Гвардиола.
