Менаџерот на Манчестер Сити, Пеп Гвардиола, по поразот од ПСЖ го пофали својот поранешен играч Лео Меси, но посебно го истакна Марко Верати. Тој вели дека е заљубен во неговата игра.
„Игравме добро. Направивме речиси се како што треба, само ги промашивме шансите. Ривалот се бранеше многу добро и се закануваше од контранапади. Игравме за да победиме, така што останува горчливиот вкус. Особено затоа што ривалот лесно постигна гол“, изјави Гвардиола.
Тој посебно го потенцираше италијанскиот репрезентативец.
„Голот на Меси беше многу убав. Ако е среќен во Париз, исто и јас. Јас сепак би го издвоил Марко Верати. Заљубен сум во него. Тој е фантастичен играч. Мал е, но секогаш може да се смета на него. Среќен сум што се опорави од повредата и повторно игра“, дополни Гвардиола.
„Граѓаните“ синоќа беа поразени од ПСЖ со 2-0 во второто коло од Лигата на шампионите. Сити викендов гостува кај Ливерпул, што ќе биде дерби од седмото коло во Премиер – лигата.
