Фудбалерите на ФК Кит Го максимално активно во својата база во Пехчево ги одработуваат подготовките за новата сезона во Втората лига – Исток.
Шефот на стручниот штаб Емил Грнев е задоволен од текот на подготовките истакнувајќи дека се уште претстои период на адаптација за сите нови фудбалери, но верува дека тимот максимално подготвен ќе го дочека стартот на новата сезона.
„Задоволен сум од тоа како течат подготовките. Имаме одлични услови за работа, па наскоро очекувам и преку пријателските натпревари екипата и комплетно да се воигра. Мислам дека и новите фудбалери одлично се вклопија во тимот. Низ тестовите кои ни престојат верувам дека подготвени ќе го дочекаме стартот на шампионатот“ – вели Грнев.
Првиот тест за потенцијалот на новиот состав на Кит Го ќе биде на пријателскиот натпревар против Плачковица закажан за 19. јули. Покрај дуелот со Плачковица, Кит Го договори уште три контролни средби во овој период, со Борец, Беласица и Кожуф.
