Македонскиот првак Струга Трим Лум утре (18 часот) во Вилнус ќе се соочи со Жалгирис во првиот меч од воведното квалификациско коло во Лигата на шампионите. Искуството од настапите на европска сцена го прави ривалот благ фаворит, но тренерот Шпетим Дуро напомена дека во фудбалот секогаш не победуваат екипите што биле фаворизирани пред почетокот на дуелот.
„Ова секако е историски настап за Струга Трим Лум. Клубот е основан пред само осум години и достигна толку многу. Можеби Жалгирис а фаворит, има поголемо искуство со настапи во Европа, но тоа не значи и дека на крајот ќе слави пласман понатаму. Ние се подготвувавме максимално, трениравме и на терен со вештачка трева знаејќи дека такви услови нѐ очекуваат овде во Вилнус. Утре ќе играме значаен меч, но патникот во следната рунда ќе се решава на реваншот кога ние ќе бидеме домаќини“, истакна Шпетим Дуро.
Натпреварот меѓу Жалгирис и Струга ТЛ е закажан за 18 часот на стадионот „ЛФФ“.
