Само европските клубови можат да играат во Лигата на шампионите, Лигата на Европа и Конференциската лига, изјави претседателот на УЕФА, Александар Чеферин, во интервју за француски „Л’Екип“. Ова е одговорот на предводникот на европскиот фудбал на обвинувањата дека Саудиска Арабија сака во блиска иднина да има свој претставник во елитната европска Лига на шампиони.
„Мислам дека парите на Саудиска Арабија не се закана за европскиот фудбал. Имавме слични примери и претходно. Фудбалерите заминаа во Кина, доаѓаа големи понуди од таа земја, но кинескиот фудбал не напредуваше поради тоа. Мислам дека во Саудиска Арабија, или каде било на друго место, би требало да се инвестира во образованието и развојот на тренерите и играчите“, изјави 55-годишниот Чеферин и се осврна на двете можеби најголеми фудбалски ѕвезди во Европа во моментов.
„Колку што знам, Килијан Мбапе и Ерлинг Халанд не сонуваат да одат во Саудиска Арабија. Повторувам, навистина не верувам дека квалитетот на нашите натпреварувања ќе биде загрозен во која било смисла“, потенцира претседателот на УЕФА.
