Селекторот на репрезентацијата на Уругвај, Марсело Биелса, изјави дека неговиот авторитет бил доведен во прашање кога фудбалерот Луис Суарез го критикувал неговиот стил на работа.
Суарез, кој во септември се повлече од репрезентацијата на Уругвај, на почетокот на месецот рече дека Биелса ја поделил екипата и дека некои играчи размислуваат да се повлечат од националниот тим.
Најдобриот стрелец на уругвајската репрезентација во интервју за телевизијата „DSports“ ги замоли навивачите да не ги критикуваат играчите кога работите не одат добро, бидејќи тие ќе „експлодираат“ под условите на работа на аргентинскиот тренер.
„Во однос на тоа како оваа ситуација влијаеше на мене, не го игнорирам тоа што се случи и знам дека на некој начин влијаеше врз мојот авторитет“, рече Биелса за „Би-Би-Си“.
Уругвај загуби од Перу со 0:1 во јужноамериканските квалификации за Светското првенство 2026 година, но сè уште е трет во групата со 15 бода од девет натпревари, зад Аргентина и Колумбија.
„Она што се случи во текот на неделата не се одразува ниту го објаснува начинот на кој игравме, ниту пак мислам дека имаше некакво влијание, бидејќи тоа беше недела со многу страст. Тоа не ја промени убеденоста со која беше подготвен натпреварот и начинот на кој тимот и тренерите работеа. Подготовките беа исти како и секогаш“, изјави Биелса.
Суарез исто така ја критикуваше постапката кон фудбалерот Аугустин Кановио, кој мораше да тренира како резерва и додавач на топки за време на Купот на Америка, а на членовите на стручниот штаб не им беше дозволено да се поздравуваат или да јадат со тимот.
Биелса во февруари 2022 година доби отказ од Лидс, а е познат по интензивните тренинзи и педантната работа додека работеше на „Еланд Роуд“.
Тој беше назначен за селектор на Уругвај во мај 2023 година, со цел да создаде силен тим за Светското првенство 2026 година.
