Карим Бензема ниту потврди ниту демантираше дека ќе замине од Реал Мадрид во Саудиска Арабија. Наместо тоа, тој упати пофалби за Реал Мадрид и за навивачите на тимот, на денешната церемонија на која на Французинот му беше врачена наградата „Легенда на Марка“. Секоја година се доделува од 1997 година од реномираниот шпанска медиум на најдобрите спортисти во историјата.
Напаѓачот не сакаше да ја коментира својата иднина, бидејќи според сите светски медиуми тој веќе донел одлука да се пресели во Саудиска Арабија, во тимот на Ал-Итихад, од кој добил мултимилионска понуда.
„Бев дете кога дојдов во Реал Мадрид, на 21 година. Нема друг клуб како Реал Мадрид кој игра на стадион како Сантијаго Бернабеу – местото каде што играле најголемите играчи. Размислував само да уживам и да освојувам трофеи и на крајот гледам дека сум освоил многу со Реал Мадрид“, започна тој.
Бензема исто така објасни дека неговите омилени голови биле првиот гол за „кралскиот клуб“, како и пеналот во стилот на Паненка против Манчестер Сити на „Итихад“ минатата сезона. Омилен противник на освојувачот на „Златната топка“ е Барселона. Тој сподели и дека идол му бил Роналдо- Феноменот.
Французинот имаше убави зборови за претседателот на клубот Флорентино Перез.
„Тој е човекот кој ми дозволи да бидам овде денес. Човекот кој потпиша договор со Зинедин Зидан и човекот кој ме донесе во Реал Мадрид”.
Французинот не пропушти да ги пофали навивачите на тимот со објаснување дека сѐ што прави на теренот е поради нив.
„Знам колку ме сакаат навивачите на Реал Мадрид. Тоа многу ми значи. Навивачите на Реал Мадрид се најдобрите во светот”, истакна тој.
Бензема продолжи да биде неодреден за својата иднина.
„Дали ќе останам? Засега имам натпревар за време на викендот, утре тренирам, па во моментов сум во Мадрид. Тогаш ќе видиме. Да зборуваме за мојата иднина? Зошто да кажам нешто? Луѓето зборуваат? Пишуваат на интернет? Но, реалноста не е интернет“, одговори Бензема.
