Беласица прослави 100-годишен јубилеј, Брегалница победи…Посебна плакета за Горан Пандев (ФОТО)

Македонскиот фудбалски клуб Беласица го прослави големиот јубилеј, сто години постоење, откако вечерва на стадионот „Благој Истатов“ одигра пријателски натпревар против Брегалница. Свечената церемонија ја збогати и присуството на најдобриот македонски фудбалер Горан Пандев, кој доби специјална плакета во оваа пригода.

„Сите заедно треба да ја чуваме Беласица. Чест ми е што сум денеска тука“, изјави Горан Пандев.

Имаше и културно-уметничка програма, а последен дел од манифестацијата беше пријателскиот меч меѓу Беласица и Брегалница кој му припадна на прволигашот со триумф од 1-2.

Радојчиќ во четвртата минута донесе водство за Беласица, а израмни Додев во 23. минута. Победничкиот гол беше дело на Марселин Галдо Биала, фудбалер кој е на проба во Брегалница. Тој постигна убав погодок со шут од далечина во 73.минута.