Шкендија е лидер на табелата по есенскиот дел од шампионтот, но долга е пролетта и ќе мора тимот на Ернест Ѓока да се докажува на секој нареден натпревар. Предноста од шест бода во однос на Шкупи и на Македонија ЃП ќе треба да се задржи со добри игри и победи.
Шкендија денеска гостува во Кратово и сака победа против Силекс. Но, дефанзивецот Егзон Бејтулаи вели дека приодот на Шкендија мора да биде максимално сериозен, затоа што Силекс не е екипа за потценување.
„Подготвени сме за почетокот на пролетта. Одложувањето го искористивме за да подобриме уште некои сегменти, но сега пред нас е предизвикот Силекс. Свесни сме дека како лидери секој противник ќе игра против нас со дополнителен мотив. Нема да биде лесно, но нашата цел е јасна – одиме на победа во Кратово. Сепак, Силекс е квалитетен тим и мора да бидеме внимателни“, вели капитенот на Шкендија.
На останатите натпревари, Шкупи му гостува на Борец во Велес, Струга Трим Лум го пречекува составот на Македонија ЃП, а Ренова е домаќин на Беласица.
На арената „Тодор Проески“ ќе се одигра вечното дерби меѓу Вардар и Пелистер, а во единствениот одигран меч од 19.коло минатиот викенд Работнички ја совлада Академија Пандев со 0-1.
