Менаџерот на Арсенал, Микел Артета, беше незадоволен по поразот со 1-0 од Порто во првиот натпревар од осминафиналето во Лигата на шампионите. Неговиот тим делуваше безлично на „Драгао“ и го заврши мечот без ниту еден прецизен удар.
Според менаџерот на Арсенал, неговите играчи можат многу повеќе и тоа ќе го покажат во реваншот.
„Требаше подобро да го контролираме натпреварот. Не можеме да победиме кога ќе ја изгубиме топката трипати длабоко во нашата половина. Мораме да го направиме тоа многу поинаку на „Емирати“. Ни недостигаше опасност пред противничкиот гол. Ни недостигаше агресија, особено во последната третина. Можеме многу повеќе“, убеден е Микел Артета.
„Мислам дека Порто е добро организиран тим во одбраната и знае постојано да го крши ритамот. Има работи кои ќе мора да ги направиме подобро во реваншот. Знаеме што да очекуваме”, додаде менаџерот на Арсенал.
