Тренерот на Реал Мадрид, Карло Анчелоти, немаше причини за радост по поразот со 1-3 од Милан во Лигата на шампионите. Ова е уште еден натпревар оваа сезона во кој неговиот тим покажува сериозни слабости, особено во одбраната.
Тренерот изјави дека на тимот му недостига стабилност и е премногу кревок.
„Не ја видов потребната реакција по поразот од Барселона и проблемите остануваат. Ни недостига цврстина во одбраната, а често сме небалансирани при контранападите. Треба да го поправиме тоа. Премногу сме кревки и тоа мора да се промени“, изјави Анчелоти.
Според него, тимот има причини за загриженост по уште еден слаб натпревар оваа сезона.
„Треба да бидеме загрижени, затоа што овој тим има голем потенцијал, но не го покажува. Треба да ги изградиме основите кои во моментот недостасуваат. Кога не си стабилен во одбраната, тоа може да го наруши секој натпревар. Понекогаш успеваме да се извлечеме од тешки ситуации, но не може секогаш така“, додаде Италијанецот.
„Вистината е дека моментно не сме доволно ефикасни во нападот и не ги користиме добро нашите шанси, но нашиот поголем проблем е одбраната. Ова се основни работи во фудбалот и очигледно треба да промениме нешто за да се браниме подобро“, заврши Карло Анчелоти.
