Тренерот на Реал Мадрид, Карло Анчелоти беше незадоволен од ремито против Осасуна (1-1). За првпат во сезоната „кралевите“ не победија на официјален натпревар и и ја препуштија лидерската позиција во Ла Лига на Барселона. Двата тима имаат еднаков број бодови, но Каталонците имаат подобра гол разлика.
„Не игравме со доволен интензитет. Дефинитивно немавме свој ден, но ја заслуживме победата. Генерално, не сум задоволен. Во второто полувреме имаше подобрување. Замените донесоа свежи идеи, но натпреварот не одеше според нашите планови. Нерешениот резултат е разочарувачки резултат“, прокоментира Анчелоти.
Тој застана на страната на Карим Бензема.
„Нормално е што Бензема не е во оптимална форма по повредата. Тој е нашиот најдобар изведувач на пенали. Не делуваше опасно? Во последните минути се играше фудбал кој не му одговараше. Една позитивна серија заврши, но можеме да започнеме уште една“, додаде италијанскиот стратег.
