Александар Васоски е нов тренер на Академија Пандев. Денеска новиот шеф на стручниот штаб се запозна со условите кои клубот ги нуди и беа финализирани наредните чекори кои ќе се преземат за клубот да се подигне на уште повисоко ниво. Заедно со Васоски, доаѓаат и Раденко Бојовиќ како прв асистент и Тони Богдановски како кондициски тренер.
Позната е и програмата за зимските подготовки. Прозивката е на 8. јануари во Струмица, каде ќе се одработи и првиот дел од подготовките. На 20. јануари тимот заминува на двонеделни подготовки во Анталија – Турција, каде се планирани и неколку пријателски натпревари.
„Огромна чест и задоволство ни е што едно од нашите најголеми фудбалски имиња, а воедно и еден од најдобрите македонски тренери ја прифати нашата понуда и се пронајде во визијата која клубот ја негува, а тоа е создавање на млади фудбалери кои подоцна ќе настапуваат во екипи од врвните европски лиги“, велат од Академија Пандев.
