Дефанзивецот на Манчестер Јунајтед, Виктор Линделоф, замина на операција. Ова го откри менаџерот Ерик тен Хаг кој не објасни точно што е проблемот на Швеѓанецот, но истакна дека ќе биде надвор од терените барем уште неколку недели.
„Виктор Линделоф не е достапен. Имаше операција и ќе биде надвор од теренот неколку недели. Што се случи? Имаше проблем и мораше да оди на операција”, сподели Тен Хаг.
29-годишниот дефанзивец беше надвор од теренот од натпреварот против Челси на 6 декември, кога беше заменет на полувремето. Тој сигурно ќе ги пропушти следните три натпревари на „црвените ѓаволи“ во Премиер – лигата против Вест Хем, Астон Вила и Нотингем Форест, но се надева дека ќе биде подготвен за дуелот од ФА Купот со Виган на 8 јануари.
Тоа е уште еден проблем за Тен Хаг, кој не може да го користи подолго отсутниот Лисандро Мартинез, а Хари Мегваер исто така неодамна заработи повреда на препоните.
Така, веројатно повторно ќе мора да се потпре на Рафаел Варан и на Џони Еванс во срцето на одбраната, а постои шанса таму да биде преселен и Лук Шо, кој исто така има искуство на оваа позиција.
