Ѕвездата на Реал Мадрид, Џуд Белингам, е добитник на наградата „Златно момче“ за 2023 година за најдобар фудбалер во Европа до 21 година, објавија организаторите на анкетата на која учествуваат избрани медиуми од Стариот континент.
Импресивно, Белингам беше прогласен за победник на анкетата со 97% од гласовите, израмнувајќи го рекордот на Килијан Мбапе од 2017 година. Наградата ќе му биде врачена на англискиот репрезентативец на специјална церемонија во Торино на 4 декември.
Офанзивниот играч за врска се очекуваше да биде избран за добитник на наградата со оглед на неговите неверојатни настапи оваа година. Тој беше избран за фудбалер број 1 во Бундес-лигата минатата сезона, откако постигна осум гола и пет асистенции на 31 натпревар за Борусија Дортмунд.
Белингам оваа сезона е во уште посилна форма со Реал Мадрид, постигнувајќи 13 гола и три асистенции на 14 настапи во сите натпреварувања досега.
Во освојувањето на наградата „Златно момче“, Англичанецот им се придружува на Вејн Руни, Лионел Меси, Рахим Стерлинг, Килијан Мбапе, Ерлинг Халанд, Педри и Гави, кои исто така ја освојувале наградата од 2003 година.
